Chromium

24 Vanadium ← chromium → Manganum Al ↑ Cr ↓ Mo Systema periodicum
Proprietates generales
Nomen, Symbolus, Numerus Atomicus	chromium, Cr, 24

Chromium est elementum chemicum metallicum transitionis cui numerus atomicus 24 et symbolum Cr. In grege sexto et periodo quarta systematis periodici ponitur. Quattuor isotopos stabiles habet ⁵⁰Cr, ⁵²Cr, ⁵³Cr, et ⁵⁴Cr: abundantissimum est chromium-52 (24 protones et 28 neutrones) et massa atomica elementi 51,996 valet. Chromium primum inventum est a Ludovico Nicolao Vauquelin anno 1797. Homines chromio in metallurgia utuntur.

De proprietatibus chemicis

Natrii chromas.

Aspectus metalli puri est cristallum durum, candidum argenteum et lucidum quia lucis maximam partem refringit. Chromium cum aliis elementis reagit sed nec ab aëre oxidatur nec ab aqua mutatur. Duo praecipui gradus oxidationis in natura reperiuntur: +3 et +6. Eius configuratio electronica notatur 3d⁵4s¹. Temperatura qua liquidum fit: 1860 gradus Celsiani. Qua gas fit: 2600 gradus Celsiani. Massa per volumen: 7,19g/cm³.

Compositum chromii naturaliter abundans est chromita FeCr₂O₄. Utilis est etiam natrii chromas Na₂CrO₄, solidum aureum. Cation Cr³⁺ colorem suum carbunculo confert.

De purificatione

Pars birotae 'chromiatae'.

Industria chemica chromium purum ex mixturis mineralibus magnis temperaturis extrahit sive ex chromita per carbonium sive etiam ex alio oxido Cr₂O₃ per aluminium secundum reactiones infrascriptas:

FeCr₂O₄(s) + 4 C(s) → Fe(l) + 2 Cr(l) + 4 CO(g)

Cr₂O₃(s) + 2 Al(s) → Al₂O₃(s) + 2 Cr(l)

De usu humano

Chromium aciariis additur ne oxidentur (aciarium inoxidabile) sed etiam per electrolysim tenuis pellicula chromii certis partibus autocinetorum aut birotarum automatariarum adplicatur non tantum contra oxidationem sed etiam ut magis luceant.

Nuper adhuc chromium micronutrimentum mammalibus necessarium habebatur atque diaetae addebatur (quamquam multa alimenta iam chromii minimam partem continent). Nunc tamen de utilitate chromii ad salutem dubitatur nec iam inter micronutrimenta ponitur. Econtra constat chromium(VI), hoc est cum gradu oxidationis +6, carcinogenum esse cum inhalatur.

Composita quoque suas utilitates invenerunt tamquam pigmenta in ceramica aut fungicidae (sales chromii).

Plura legere si cupis

Puri chromii cristalla.

• Carlos Cervantes , Jesús Campos-García , Silvia Devars , Félix Gutiérrez-Corona , Herminia Loza-Tavera , Juan Carlos Torres-Guzmán , Rafael Moreno-Sánchez. "Interactions of chromium with microorganisms and plants", FEMS Microbiology Reviews, 2001: 335–347
• Y. Roman-Garcia, L. Moraes, D.H. Kleinschmit, A. Gomez, M.T. Socha. "Quantifying production responses to the supplementation of chromium in lactating dairy cattle", Journal of Dairy Science, 2026
• Eleni Sazakli, "Human Health Effects of Oral Exposure to Chromium: A Systematic Review of the Epidemiological Evidence", International Journal of Environmental Research and Public Health, 2024: 406
• John B Vincent et Henry C Lukaski, "Chromium", Advances in Nutrition, 2018: 505-6

Nexus interni

• Carbunculus

Nexus externi

• Vicimedia communia plura habent quae ad chromium spectant
• Hoc elementum apud Patreon: periodic videos

Elementa chemica: series paginarum brevium

1 H 2 He 3 Li 4 Be 5 B 6 C 7 N 8 O 9 F 10 Ne 11 Na 12 Mg 13 Al 14 Si 15 P 16 S 17 Cl 18 Ar 19 K 20 Ca 21 Sc 22 Ti 23 V 24 Cr 25 Mn 26 Fe 27 Co 28 Ni 29 Cu 30 Zn 31 Ga 32 Ge 33 As 34 Se 35 Br 36 Kr 37 Rb 38 Sr 39 Y 40 Zr 41 Nb 42 Mo 43 Tc 44 Ru 45 Rh 46 Pd 47 Ag 48 Cd 49 In 50 Sn 51 Sb 52 Te 53 I 54 Xe 55 Cs 56 Ba 57 La 58 Ce 59 Pr 60 Nd 61 Pm 62 Sm 63 Eu 64 Gd 65 Tb 66 Dy 67 Ho 68 Er 69 Tm 70 Yb 71 Lu 72 Hf 73 Ta 74 W 75 Re 76 Os 77 Ir 78 Pt 79 Au 80 Hg 81 Tl 82 Pb 83 Bi 84 Po 85 At 86 Rn 87 Fr 88 Ra 89 Ac 90 Th 91 Pa 92 U 93 Np 94 Pu 95 Am 96 Cm 97 Bk 98 Cf 99 Es 100 Fm 101 Md 102 No 103 Lr 104 Rf 105 Db 106 Sg 107 Bh 108 Hs 109 Mt 110 Ds 111 Rg 112 Cn 113 Nh 114 Fl 115 Mc 116 Lv 117 Ts 118 Og Elementum • Systema periodicum